இரண்டாம் பருவம்- அலகு-4 பாடக்குறிப்புகள்

அலகு- 4: இக்கால இலக்கியம் -II

1. திருக்குறள் மாநாடு – பெரியார் உரை

• ஆரியத்தை ஒழிக்கும் ஆயுதம்: திருக்குறளே ஆரியத்தை ஒழிக்கும் ஒப்பற்ற ஆயுதம் என்று பெரியார் குறிப்பிடுகிறார்.

• தன்னறிவு முதன்மை: பெரியார் எப்போதும் தன் அறிவு ஒன்றையே ஆதாரமாகக் கொண்டு செயல்பட்டவர்.

• நடைமுறைப்படுத்தல்: மனிதன் ஒவ்வொருவனும் தன் வாழ்வுக்குத் தானே எஜமானன் என்பதை உணர்ந்து செயலாற்றுவதே நன்மை பயக்கும்.

• திருக்குறள் மீதான பார்வை: இன்று தாம் திருக்குறளைப் புகழ்வதற்குக் காரணம், தம்முடைய கருத்துகள் அதில் காணப்படுவதுதான்.

• பகுத்தறிவுக்கு ஒவ்வாததை நீக்குதல்: திருக்குறளில் தம் முன்னேற்றக் கருத்துக்கு ஒவ்வாதன இருப்பின், அவற்றை விலக்கத் தாம் ஒருபோதும் தயங்கப் போவதில்லை என்று தெரிவித்தார்.

• குறளும் சுயமரியாதையும்:

  • சுயமரியாதைப் பிரச்சாரத்தால் மூட நம்பிக்கைகளும், ஆரிய முறையும் பெருமளவுக்கு நீங்கிவிட்டன.

  • நீண்ட நாட்களாக ஆரியத்தால் புகுத்தப்பட்ட கடவுள், மதம் சார்ந்த மூட நம்பிக்கைகள் ஒழிக்கப்படும் வரை திருக்குறளை மக்களிடையே பரப்பினால் பயனில்லை என்று உணர்ந்ததால் முன்பு அதிகம் பேசாமல் இருந்தார்.

  • இன்று சுயமரியாதைப் பிரசாரம் வெற்றி பெற்று, ஆரியம் அழியும் காலம் நெருங்கிவிட்டதை அறிந்த பிறகே திருக்குறளைப் பரப்பத் துணிவு கொண்டு மாநாட்டைக் கூட்டினர்.

• ஒழுக்கக் கேடு: சமுதாயத்தின் ஒழுக்கமும், நாணயமும் மிகவும் கெட்டுவிட்டதாகவும், இத்தகைய ஒழுக்கக் கேட்டிற்குக் காரணமான கடவுளும் மதமும் மாற்றப்பட்டாக வேண்டுமென்றும் தெரிவித்தார்.

• காந்தியடிகள் உதாரணம்: காந்தியார் வணங்கிய கடவுளும், போற்றிய அகிம்சை, சத்தியம், மதமும் அவருக்கே பயன்படாது போனது, இந்த உண்மையை மக்களுக்குப் புலப்படுத்த வேண்டும் என்பதற்காகவே.

• வாழ்க்கையைச் செப்பனிடுதல்: திருக்குறளை யார் எழுதியது, அவர் காலமென்ன என்ற ஆராய்ச்சிகளை எல்லாம் சரித்திரப் பேராசிரியர்களுக்கே விட்டுவிட்டு, குறளில் உள்ள கருத்துகளின்படி நம் வாழ்க்கையை செப்பனிட்டுக் கொள்ள வேண்டும் என்று வலியுறுத்தினார்.

• உருவக் கடவுள் இல்லை: வள்ளுவர் எங்கும் உருவக் கடவுளைப் பற்றிக் குறிக்கவே இல்லை என்றும்.

• கடவுள் வாழ்த்து விளக்கம்: கடவுள் வாழ்த்து அதிகாரத்தில் மனிதன் இன்னின்ன உயர்வான குணங்களைப் பெறுதல் வேண்டும் என்று மட்டுமே குறிப்பிடப்பட்டிருக்கிறது; அது உயர்வான மனிதத் தன்மை எதுவென்பதை விளக்குகிறது.

• வானின் சிறப்பு: மக்கள் ஒழுக்கமாயிருந்தால் மழை பெய்யும் என்ற மதவாதிகளின் கருத்தைக் கண்டித்து, மழை பெய்தால் தான் மக்கள் கஷ்டமின்றி வாழ முடியும், அப்போதுதான் ஒழுக்கம் நிலவ முடியும் என்று வள்ளுவர் கூறியிருப்பதைச் சுட்டிக் காட்டினார்.

• பெண்வழிச் சேரல் விளக்கம்:

  • திருவள்ளுவர் பெண்களை ஐந்து வகைகளாகப் பிரித்தே பேசியிருக்கிறார்.

  • ‘பெண் வழிச் சேரல்’ என்ற பகுதியில் குறிப்பிடப்பட்ட பெண்டிர், தான்தோன்றித்தனமாக சுதந்திரமாக வாழ்ந்து வரும் பெண்கள் (சுதந்தரர்கள்) ஆவர்.

  • அவர் வழி சேர்ந்த ஆடவர்களுக்குத்தான் கேடு சம்பவிக்கும் என்று வள்ளுவர் கூறியிருக்கிறாரே ஒழிய, பெண்களைப் பற்றி இழிவாக ஒரு வார்த்தை கூடப் பேசவில்லை.

• பொதுவுடைமைக்காரர்: திருவள்ளுவர் காலம் பொது உடைமைக்காலம் இல்லாவிட்டாலும், அவர் சிறந்த பொது உடைமைக்காரராகவே விளங்குகிறார் என்று பெரியார் போற்றுகிறார்.

• மாநாட்டு நோக்கம்: நாட்டின் மூலை முடுக்குகள் தோறும் திருவள்ளுவர் கழகங்கள் தோற்றுவிக்கப்பட்டு, திருக்குறள் கருத்துகள் பரப்பப்பட வேண்டும். குறள் ஆரியத்தை ஒழிக்க ஒப்பற்ற நல்லாயுதம்.

2.வேலைக்காரி – அறிஞர் அண்ணா (நாடகம்)

• வெளியீடு: அறிஞர் அண்ணாவால் 1947 ஆம் ஆண்டு எழுதப்பட்டு, 1949 ஆம் ஆண்டு திரைப்படமாக வெளிவந்தது.

• மையக் கரு: பணவெறியும் ஜாதி வெறியும் கொண்ட ஜமீன்தார் வேதாச்சலம் பற்றிய கதை.

• கதை மாந்தர்கள்: வேதாச்சலம் (ஜமீன்தார்), சரசு (ஆணவம் கொண்ட மகள்), மூர்த்தி (பண்புள்ளம் கொண்ட மகன்), அமிர்தம் (வேலைக்காரி), முருகேசன் (அமிர்தத்தின் தந்தை), ஆனந்தன் (சுந்தரம் பிள்ளையின் மகன்), மணி (ஆனந்தனின் நண்பன்).

• காதல்: சரசு அமிர்தத்தைக் குறை கூறும்போதெல்லாம் மூர்த்தி அவளுக்காகப் பரிந்து பேசினான்; நாளடைவில் மூர்த்தியும் அமிர்தமும் காதல் கொண்டனர்.

• சுந்தரம் பிள்ளையின் தற்கொலை: வேதாச்சலத்திடம் கடன் வாங்கிய சுந்தரம் பிள்ளை, பணத்தைத் திருப்பிக் கொடுக்காததால் அவமானத்தால் மரக்கிளையில் தூக்கிட்டுத் தற்கொலை செய்து கொள்கின்றார்.

• ஆனந்தனின் சபதம்: தந்தையின் தற்கொலைக்குக் காரணம் வேதாச்சலம் என்பதை அறிந்த ஆனந்தன், அவரைப் பழிவாங்கத் துடிக்கின்றான்.

• மணியின் அறிவுரை: ஆனந்தன் கொலை செய்யத் துணிந்தபோது, மணி குறுக்கிட்டு, “அவனைக் கொஞ்சம் கொஞ்சமாக வாட்டி வதைக்க வேண்டும். ஊரார் முன்பாகத் தலைகுனிய வைக்க வேண்டும்” என்று அறிவுரை கூறித் தடுத்தான்.

• பரமானந்தமாக மாறுதல்: மனமுடைந்து தற்கொலைக்கு முயன்ற ஆனந்தன், பாழுங்கிணற்றில் ஒளிந்திருந்தபோது, தன்னைப் போலவே தோற்றமளிக்கும் செல்வந்தர் பரமானந்தத்தின் இறந்த உடலைக் கண்டான். வேதாச்சலத்தைப் பழிவாங்க இதுவே சரியான வழி என்று மணி, ஆனந்தனைப் பரமானந்தனாக மாற்றுவித்தான்.

• பழிவாங்கல்: பரமானந்தன் வேடத்தில் இருந்த ஆனந்தன், வேதாச்சலத்தின் மகள் சரசாவைத் திருமணம் செய்து கொண்டு, பொய்யாகக் குடித்தும், பல பெண்களுடன் தொடர்பு இருப்பது போல நடித்தும் மாமனாரின் நற்பெயரைக் கெடுத்தான். அமிர்தத்திடம் தவறாக நடப்பது போலக் காட்டி, மூர்த்திக்கும் வேதாச்சலத்திற்கும் பிளவை ஏற்படுத்தினான்.

• அமிர்தம் பாலுவின் மகளாக: வீட்டை விட்டு வெளியேறிய அமிர்தம், பாலு முதலியார் என்பவரால் அவரது மகள் சுகிர்தமாக ஏற்றுக்கொள்ளப்படுகிறாள். விபத்தில் மகளை இழந்து மனப்பிறழ்வு ஏற்பட்டிருந்த பாலு முதலியாரை, அமிர்தம் குணப்படுத்தினாள்.

• நீதிமன்றத்தில் மூர்த்தி: யோகியின் ஆசிரமத்தில் நடந்த சண்டையில் யோகி இறந்துவிட, மூர்த்தி கொலைக் குற்றம் சாட்டப்பட்டு நீதிமன்றத்தில் நிறுத்தப்படுகிறான்.

• விடுதலை: ஆனந்தன் வட இந்திய வழக்கறிஞராக மாறுவேடத்தில் வந்து, யோகி காவல்துறையினரால் தேடப்படும் குற்றவாளி என்றும், நடந்தது தற்காப்புக் கொலை என்றும் வாதிட்டு, மூர்த்தியை விடுதலை செய்கின்றான்.

• மகிழ்ச்சியான முடிவு: ஆனந்தன், ஜாதி வெறியை அடக்கவே அமிர்தத்திற்கும் மூர்த்திக்கும் திருமணத்தை நடத்தினேன் என்று வேதாச்சலத்திடம் விவரிக்கின்றான். தன் தவறுணர்ந்த வேதாச்சலம், “ஒன்றே குலம் ஒருவனே தேவன்” என்று நாட்டு மக்களுக்கு உரைப்போம் என்று கூறி நாடகம் நிறைவடைகின்றது.

3. சாக்ரடீஸ் (ராஜா ராணி) –  கலைஞர் கருணாநிதி (ஓரங்க நாடகம்)

• திரைப்படம்: 1956 ஆம் ஆண்டு வெளியான ராஜா ராணி திரைப்படத்தில் கலைஞர் கருணாநிதியால் திரைக்கதை, வசனம் எழுதப்பட்டது.

• நாடக அமைப்பு: இந்த ஓரங்க நாடகம் மூன்று காட்சிகளைக் கொண்டது.

• முதல் காட்சி (அறைகூவல்): கிரேக்கத்தின் ஏதென்ஸ் நகரின் வீதியில், சாக்ரடீஸ் இளைஞர்களுக்கு “சிந்திக்கக் கற்றுக் கொள்ளுங்கள்! அறிவை ஆயுதமாக ஏந்துங்கள்” என்று அறைகூவல் விடுக்கின்றார். அறிவாயுதமே உலகின் அணையாத ஜோதியாகும் என்று அவர் வலியுறுத்துகிறார்.

• அரசுக்கு அச்சம்: சாக்ரடீஸின் இந்த உரை அரசுக்கும் ஆட்சிக்கும் அச்சத்தைக் கொடுக்கின்றது.

• வழக்கு: அரசியல்வாதி அணிடஸ் மற்றும் கவிஞன் மெலிடஸ் ஆகியோர் சாக்ரடீஸ் மீது வழக்குத் தொடுக்கின்றனர்.

• இரண்டாம் காட்சி (நீதிமன்றம்):

  • அணிடஸ், சாக்ரடீஸை “இழிகுணக் கிழவன்” என்று கேலி செய்கின்றான்.

  • சாக்ரடீஸ் வழக்கை, “அறிவு, அர்த்தமற்ற கற்பனை, அதிகார ஆணவம் ஆகிய மூன்றுக்கும் இடையே நடக்கும் மும்முனைப் போராட்டத்தின் விளைவு” என்று விளக்குகிறார்.

  • மெலிடஸ் குற்றம் சாட்டியபோது, சாக்ரடீஸ், “நான் என்ன வாலிபருக்கு வலை வீசும் விலை மாதா?” என்று எதிர்வாதம் புரிகின்றார்.

  • நீதிபதி சாக்ரடீஸுக்கு விஷம் அருந்தி உயிர்விட வேண்டும் என்று மரணதண்டனை வழங்குகின்றார்.

• மூன்றாம் காட்சி (சிறைச்சாலை):

  • சாக்ரடீஸ் தன் மனைவி எக்ஸ்சேந்துபியிடம், “உன் கணவன் அகிலம் புகழும் வீரனாக, தேசம் புகழும் தியாகியாக மாறிவிட்டான்” என்று தேற்றுகின்றார்.

  • சிறைக் காவலன் விஷம் அருந்தி, கால்கள் மரத்துப் போகும் வரை நடந்து, பிறகு படுத்துவிட வேண்டும் என்று முறையை விவரிக்கின்றான்.

  • சாக்ரடீஸ் அதை “ஆனந்தமான நித்திரை” என்று அழைக்கின்றார்.

  • நண்பன் கிரீடோ சிறிது நேரம் பொறுத்துக் குடிக்கச் சொன்னபோது, சாக்ரடீஸ் “இந்த விஷம் அழிக்கப்போவது என்னையல்ல, இந்த உடலைத்தான்” என்று கூறுகிறார்.

• இறுதி உரை: “உன்னையே நீ அறிய வேண்டும். எதற்கு? ஏன்? எப்படி? என்று கேள்!“.

• அறிவுறுத்தல்: “எவர் சொன்ன சொல்லானாலும் அதனை உந்தன் இயல்பான பகுத்தறிவால் எண்ணிப் பார்ப்பாய்“.

• வீரம் பொங்கும் இறுதி வார்த்தைகள்: தன் பிணத்தை அடக்கம் செய்தால், “இந்நாட்டில் உலவும் புழுகு மூட்டைகளை என்னோடு புதைத்து மண்ணாக்கிவிடு” என்றும், எரித்தால் “ஏமாற்றுக்காரர்களின் சுவடிகளையும் என்னோடு சேர்த்துச் சுட்டுச் சாம்பலாக்கி தண்ணீரில் கரைத்து விடு” என்றும் கூறுகின்றார்.

4.இரண்டாம் உலகத் தமிழ் மாநாடு – அறிஞர் அண்ணா உரை (1968)

• நிகழ்வு: இரண்டாம் உலகத் தமிழ் மாநாடு, 1968 ஜனவரி 3 அன்று சென்னையில் நடைபெற்றது.

• துவக்கி வைத்தவர்: டாக்டர் ஜாகீர் உசேன், இந்தியக் குடியரசுத் தலைவர்.

• ஊர்வலம் (காலை உரை): மாபெரும் ஊர்வலம் தற்கால வரலாற்றில் சிறப்பான இடம் பெற்றது. இது தமிழகத்தின் வரலாற்றை உருவகப்படுத்தும் ஒரு நினைவு என்றும், வழக்கமான ஊர்வலம் அல்ல என்றும் அண்ணா விளக்கினார்.

• குடியரசுத் தலைவர் பாராட்டு: ஜாகீர் உசேன் ஊர்வலத்தை இறுதிவரை கண்டுகளித்து, பலமுறை பாராட்டினார்.

• அமைப்பாளர்கள்: எஸ்.எஸ்.வாசன் மற்றும் அவரது குழுவினர் ஊர்வலத்தை மிகச் சிறப்பாக ஒழுங்கமைத்தனர்.

• வாசனின் கருத்து: “தமிழகத்தினுடைய இலக்கியமும் வரலாறும் இவ்வளவு அழகானதாக இருந்திராமல் போயிருக்குமானால் நாங்கள் இப்படிப்பட்டக் காட்சிகள் அமைத்திருக்க முடியுமா?”.

• செலவு: ஊர்வலக் காட்சிகளுக்கு மட்டும் சுமார் ஆறு லட்சம் ரூபாய் செலவானது.

• துல்லியம்: எஸ்.எஸ்.வாசன் ஊர்வலத்தை எந்த நேரத்தில், எந்த இடத்தில் எந்தக் காட்சி வரவேண்டும் என்று முசோலினியின் ரயில்வே நேரத் துல்லியத்துடன் ஒப்பிடக்கூடிய வகையில் திட்டமிட்டிருந்தார்.

• அண்ணாவின் பார்வை: கலைத்துறை, எழுத்தறிவு அதிகம் இல்லாத நாட்டில் நற்கருத்துக்களைப் பயனுள்ளதாகவும் சுவையுள்ளதாகவும் எடுத்துரைக்க ஒரு சிறந்த சாதனம் என்று அண்ணா நம்பினார்.

• மாலை உரை (கருத்தரங்குகள்): நாளையதினம் முதல் தமிழ் மொழி வல்லுநர்கள் தமிழ் மொழியின் நுணுக்கங்கள், பிற மொழிகளுடனான தொடர்புகள், மற்றும் தமிழ் பிற மொழிகளுக்குத் துணையாக இருந்ததற்கான ஆதாரங்கள் குறித்து விவாதிக்க இருந்தனர்.

• தமிழின் உலகளாவியப் பரவல்: மாநாட்டில் மலேசியா, சிங்கப்பூர், ரஷ்யா, அமெரிக்கா உட்பட 30க்கும் மேற்பட்ட நாடுகளிலிருந்து ஆராய்ச்சியாளர்கள் வந்திருந்தனர்.

• பண்டைய இலக்கியச் செழுமை: ஆயிரக்கணக்கான ஆண்டுகளுக்கு முன்பே எட்டுத்தொகை, பத்துப்பாட்டு போன்ற செம்மையான இலக்கியங்கள் இருந்தன.

• திருக்குறள் தத்துவம்: “எப்பொருள் யார் யார் வாய்க் கேட்பினும் அப்பொருள் மெய்ப்பொருள் காண்பதறிவு” என்ற தத்துவத்தை உலகுக்கு அளித்தவர்கள் தமிழர்கள்.

• கண்காட்சி: மரியாதைக்குரிய சா.கணேசன் அவர்களால் ஒரு சிறப்பான கண்காட்சி பல்கலைக்கழக மண்டபத்தில் ஏற்பாடு செய்யப்பட்டிருந்தது.

• தமிழின் பெருந்தன்மை: தமிழ்ப் பண்பாடு உலகத்தின் எந்தக் கோடியில் உள்ளவர்களையும் தோழர்களாகக் கருதுகிறது; அறிவை எங்கு இருந்தாலும் எடுத்துக்கொள்வதில் பின்வாங்கியவர்கள் அல்ல.

• மேற்கோள்கள்: அண்ணா “யாதும் ஊரே யாவரும் கேளிர்” மற்றும் “தீதும் நன்றும் பிறர்தர வாரா” போன்ற இரண்டாயிரம் ஆண்டுகளுக்கு முந்தைய தமிழ்ப் பெருமகனின் கூற்றுகளை மேற்கோள் காட்டினார்.

• நம்பிக்கை: இந்த மாநாடு தமிழ் மொழிக்கு ஒரு புதிய பொலிவையும் வலிமையையும் பெற்றுத்தரும் என்றும், அது உலக அரங்கில் இணைப்பு மொழியாக, பொது மொழியாக, ஆட்சி மொழியாக மாறும் என்றும் அண்ணா உறுதியாக நம்பினார்.

5. இதழியல் – முரசொலி கடிதம் (செம்மொழி வரலாற்றில் சில செப்பேடுகள்)

• நிகழ்வு: உலகத் தமிழ்ச் செம்மொழி மாநாடு முதன்முதலாக 2010 ஆம் ஆண்டு கோவையில் ஜூன் மாதம் 23 ஆம் நாள் முதல் 27ஆம் நாள் வரை ஐந்து நாட்கள் நடைபெற்றது.

• முரசொலி கட்டுரை: கலைஞர் கருணாநிதி அவர்கள் மாநாடு நடப்பதற்கு முன்னர் தம் முரசொலி இதழில் “செம்மொழி வரலாற்றில் சில செப்பேடுகள்” என்ற தலைப்பில் முதல் கட்டுரை உட்பட எட்டுக் கட்டுரைகளை வழங்கினார்.

• பரிதிமாற் கலைஞரின் பங்கு: தமிழ் மொழியைச் செம்மொழி என அறிவித்த முதல் அறிஞர் பரிதிமாற்கலைஞர் ஆவார்.

• பரிதிமாற் கலைஞரின் கருத்து:

  • 1902 ஆம் ஆண்டு செந்தமிழ் இதழில், “உயர்தனிச் செம்மொழி“ என்ற தலைப்பில், தமிழ்மொழி எவ்வாற்றால் ஆராய்ந்தாலும் உயர்தனிச் செம்மொழியே என்று விளக்கினார்.

  • 1903 ஆம் ஆண்டு “தமிழ் மொழியின் வரலாறு“ என்ற நூலில், தமிழ் மொழியை, தெலுங்கு முதலியவற்றிற்கெல்லாம் தலைமையும் மிக்க மேதகவும் உடையதால் உயர்மொழி என்கிறார்.

  • தமிழைச் செம்மொழி என நூறாண்டுகளுக்கு முன்பே உறுதியாக நிலைநாட்டிய பெருமை அவரைச் சாரும்.

• கலைஞர் வழங்கிய அரசு மரியாதை:

  • பரிதிமாற் கலைஞர் வாழ்ந்த இல்லத்தை நினைவு இல்லமாக்கினார்.

  • அவரது மார்பளவு சிலையை நினைவு இல்லத்தின் முகப்பில் நிறுவினார்.

  • அவரது அனைத்து நூல்களையும் அரசுடைமையாக்கினார்.

  • 2007 ஆம் ஆண்டு நினைவு சிறப்பு அஞ்சல் தலை ஒன்றை வெளியிட்டார்.

  • நினைவு இல்லத்தைத் திறந்து வைத்தபோது, “தமிழுக்குச் செம்மொழித் தகுதி கோரிக் குரல் கொடுத்த முதல் தமிழன் பரிதிமாற்கலைஞர் புகழ் வாழ்க” என்று கையொப்பமிட்டார்.

• பரிதிமாற் கலைஞரின் தமிழ்ப்பணி:

  • தமிழில் நாடக இலக்கண நூல் இல்லாத குறையைப் போக்க “நாடகவியல்“ என்னும் நூல் எழுதி வெளியிட்டுள்ளார்.

  • சென்னைப் பல்கலைக்கழகம் உள்நாட்டு மொழிகளைப் பாடப் பகுதியிலிருந்து நீக்கத் திட்டமிட்டபோது, திரு பூர்ணலிங்கம் அவர்களோடு இணைந்து அத்திட்டத்தைத் தடுத்தார்.

  • “தமிழ் மொழியின் வரலாறு” என்ற தம் நூலில், வடமொழியாளர்களின் முகத்திரையைக் கிழித்து, அவர்களுடைய வேஷத்தை வெளிச்சம் போட்டுக் காட்டியுள்ளார்.

6.தொல்காப்பியப் பூங்கா – கலைஞர் கருணாநிதி

• நூல் விளக்கம்: கலைஞர் கருணாநிதி அவர்கள் தொல்காப்பியத்தின் நூற்பாக்களுக்குப் புதுமையான முறையில் விளக்கம் அளித்துள்ளார்.

• எழுத்ததிகாரத்தின் முதல் நூற்பா: எல்லா மொழிகளுக்கும் ஒலிதான் மூலம் என்பதால், தொல்காப்பியரின் கனவில் எழுத்துகள் ஒலி எழுப்பியவாறு அணிவகுத்து நின்றன.

  • முதல் வரிசை: அ, ஆ, இ, ஈ, உ, ஊ, எ, ஏ, ஐ, ஒ, ஓ, ஔ (உயிரெழுத்துகள்).

  • பின் வரிசை: க் முதல் ன் வரை உள்ள 18 மெய்யெழுத்துகள்.

• குற்றியலிகரம், குற்றியலுகரம்: அவற்றின் ஒலி குறுகியதாக இருந்ததால், முதல் எழுத்துகள் முப்பதின் வரிசையில் இடம் பெற முடியாது என்று தொல்காப்பியர் கூறிவிட்டார். அவை சார்பெழுத்துகள் வரிசையில் இடம் பெறும்.

• ஆய்த எழுத்து: ஆயுதம் ஏந்திக் கொண்டு வந்த ஆய்த எழுத்து, முக்கியமான சமயங்களில் உதவிக்கு வருவதாக அடக்கத்துடன் கூறியது.

• முதல் நூற்பா:

  • “எழுத்தெனப் படுப அகர முதல் னகர ஈறுவாய் முப்பஃதென்ப சார்ந்து வரல் மரபின் மூன்றலங்கடையே” (எழுத்து, நூல் மரபு- 1).

• தொல்காப்பியரின் வியப்பு: “முப்பஃ தென்ப” என்ற தொடரில் ஆய்த எழுத்து (ஃ-ஐக்கு உள்ளே உள்ள மூன்று புள்ளிகள், அதாவது முப்பால் புள்ளி) அமர்ந்து கொண்டதை தொல்காப்பியர் வியப்புடன் கண்டு மகிழ்ச்சி கொண்டார்.

• சார்பெழுத்துகள்: குற்றியலிகரம், குற்றியலுகரம், ஆய்தம் ஆகிய மூன்றும் சார்பெழுத்துகள் என்று அழைக்கப்படுகின்றன. இவை தனித்து இயங்கும் ஆற்றல் இல்லாமல், பிற எழுத்துகளோடு பொருந்தி வரும் தன்மை கொண்டவை.